گل لا کے کوہجے کملے نوں لج پال نے کرم کما چھڈیا
مینوں منگناں پیانئیں در در توں ایسا خیر سخی نے پا چھڈیا
میرا بھریا مرشد کاسہ اے چھڈی تھوڑ نہ کوئی ماسہ اے
زنگ لاہ کے سارے غیراں دے مینوں اپنا رنگ چڑھا چھڈیا
در در تے گدائیاں کیتیاں نئیں اساں ہور کمائیاں کیتیاں نئیں
اک سوہنیاں تیرا ناں سوہناں اساں دم دم نال پکا چھڈیا
جاواں صدقے چارہ سازیاں توں قربان غریب نوازیاں توں
لجپال نے اپنے لڑ لا کے مینوں ہور دا ہور بنا چھڈیا
سچ کہناں ڈنڈی مار دا نہیں میں ہور کسے کم کار دا نئیں
دیواں یار دا ہوکا گلی و گلی اس کم مرشد نے لا چھڈیا
بنی جد توں گولی مرشد دی بولے لوں لوں بولی مرشد دی
اک مست نگاہواں والے نے مینوں ایسا جام پلا چھڈیا
تیری گلی روے آباد سدا تیری ہندی روے امداد سدا
اک در اتے بہہ جا چپ کر کے میں دل نوں ایہہ سمجھا چھڈیا
ہویاں کرم نوازیاں بڑیاں نے چنگیاں سنگ اکھیاں لڑیاں نے
روے وسدا دوارا سخیاں دا جناں دیکے خیر رجا چھڈیا
کیویں بھلاں اپنے ماضی نوں سی جان دا کون نیازی نوں
ہر پاسے تیری نسبت نے میرے نام دا رولا پا چھڈیا
شاعر کا نام :- عبدالستار نیازی
کتاب کا نام :- کلیات نیازی