مظہرِ شان و شکوہِ مصطفیٰؐ مولیٰ علی
ضیغمِ حق ، بو تراب ، و مر تضیٰ مولیٰ علی
اک علامت عزم و استقلال کی ہر دور میں
ایک رعنا پیکرِ فقر و غنا مولیٰ علی
آسمانِ اتقا وہ نیّرِ برجِ ولا
قائدِ ایوانِ تسلیم و رضا مولیٰ علی
منزلت ہے آپ کی مَن کُنت مولیٰ سے عیاں
ہیں بجا ہارونِ خیر الانبیاؐ مولیٰ علی
لافتیٰ الّا علی ہے جن کا اعزاز و شرف
وہ جری وہ مردِ میدانِ وفا مولیٰ علی
آپ کا ہر فیصلہ عہد آفرین و عہد گر
ماہِ حکمت برسر، چرخِ صفا مولیٰ علی
دلکش و معجز نما ہیں ان کے خطبات و خطوط
دورِ نازک میں تدبّر کی صدا مولیٰ علی
کب جہاں نے دیکھا ان سا شارحِ ام الکتاب
شانِ منبر، وہ خطیبِ خوشنوا مولیٰ علی
قابلِ تقلید کردار ان کا صلح و جنگ میں
گویا ہر میدان میں ٹھہرے رہنما مولیٰ علی
شاعر کا نام :- حفیظ تائب
کتاب کا نام :- اَصحاَبِی کَاالنُّجُوم