اے امامِ عارفین و سالکیں
اے امیرِ کاروانِ مرسلیں
ا ے سفیر مالکِ دنیا و دیں
اے سراپا رَحمتَہ اللعَالمین ﷺ
واقفِ اسرارِ حق دانائے کُل
تاجدار انبیا ختم رُسُل
راز دارِ خلوت عرشِ بریں
اے سراپا رَحمتَہ اللعَالمین ﷺ
ہم گناہ گارون پہ بھی چشمِ کرم
اے شناسائے رموزِ کیف و کم
شافعِ محشر ‘ پناہ مذنبیں
اے سراپا رَحمتَہ اللعَالمین ﷺ
زندگی ہے مبتلائے تیرگی
پھر عطا ہو اس کو نورِ آگہی
جو ہر آئینہ علم و یقیں
اے سراپا رَحمتَہ اللعَالمین ﷺ
زہر کی تلخی ہے اب حالات میں
دم گھٹا جاتا ہے اس ظلمات میں
المدد اے سبز گنبد کے مکیں
اے سراپا رَحمتَہ اللعَالمین ﷺ
شاعر کا نام :- پروفیسراقبال عظیم
کتاب کا نام :- زبُورِ حرم