بخت میرا جو محبت میں رسا ہو جائے

بخت میرا جو محبت میں رسا ہو جائے

میری تقدیر، مدینے کی فضا ہو جائے

---

کاش مقبول مِرے دل کی دُعا ہوجائے

ایک سجدہ درِ مولاؐ پہ ادا ہوجائے

---

اُس کی تعظیم کو اُٹھتے ہیں سلاطینِ جہاں

ترے کُوچے سے جو منسوب گدا ہو جائے

---

لے بھی آ زلفِ پیمبرؐ کی مہک، دیر نہ کر

اے صبا! مجھ پہ یہ احسا ذرا ہو جائے

---

اُس کو اپنی ہی خبر ہو ، نہ دو عالَم کا خیال

جو بھی دیوانۂ محبوبِؐ خدا ہو جائے

---

مَیں مدینے کی زیارت سے بہت خوش ہُوں مگر

چاہتا ہُوں کہ یہ مسکن ہی مِرا ہو جائے

---

اُنؐ کے دامن کو مِرے ہاتھ کسی دن چھُو لیں

کچھ نہ کچھ حقِّ عقیدت تو ادا ہوجائے

---

وہ سرِ طُور ہو یا مِصر کا بازارِ حَسیں

وہ جہاں چاہے، وہاں جلوہ نُما ہو جائے

---

اب بُلا لو، کہ مجھے دَم کا بھروسہ نہ رہا

نہیں معلوم کسی وقت بھی کیا ہوجائے

---

میرے نزدیک مقدّر کا دھنی ہے وہ نصیرؔ

جس پہ اُن کی نظرِ لُطف و عطا ہوجائے