بلندیوں پہ ہمارا نصیب آ پہنچا
زہِے نصیب مدینہ قریب آپہنچا
نظر میں کعبے کا کعبہ لبوں پہ صَلِّ علیٰ
مِرا کہاں سے کہاں تک نصیب آپہنچا
سرِ نیاز جھکاؤ ادب سے دیوانوں
وہ دیکھو گنبدِ خِضرا قریب آپہنچا
قریب تھا کہ سَفینہ بھنور میں آجاتا
مِری مدد کو خُدا کا حبیبؐ آ پہنچا
کھڑی تھی مَوت سر ہانے نئی حیات مِلی
خدا کا شکر کہ میرا طبیب آ پہنچا
میں اپنے شوق کے قرباں تِری عطا کے نثار
شکِستہ پا ترے دَر کے قریب آپہنچا
نِثار میں کرمِ بے حِسَاب کے خالدؔ
دَیّارِ طیبہ میں مُجھ سا غریب آ پہنچا