در چھڈ کے احمدِؐ مرُسل دا کسے ہور دوارے جایئے کیوں
دوجگ دی رحمت کیوں چھڈیئے در در دیاں جھڑکاں کھایئے کیوں
جیہڑا یار صدیق عمر دا اے جیہڑا یارعثمان حیدر دا اے
جے اوہ یار خدا دا مل جاوے کسے ہور نوں یار بنایئے کیوں
اوہو مُونس غم دے ماریاں دا محرم عاصی بے چاریاں دا
اُس رحمتِ عالمؐ دے ہُندیاں اسیں دوزخ دا غم کھایئے کیوں
کِتے ملیں تے درد سُنادیئے دل چیر کے آپ دکھا دیئے
غیراں اگے دُکھڑے پھولئے کیوں نالے دل دے زخم دکھایئے کیوں
اسیں اعظؔم ڈر دے بول دے نہیں ایہہ راز محبت کھول دے نہیں
جے دل دا محرم مل جاوے اسیں دل دے راز چھپایئے کیوں
شاعر کا نام :- محمد اعظم چشتی
کتاب کا نام :- کلیاتِ اعظم چشتی