دل مدینے میں رہے جان مدینے میں رہے

دل مدینے میں رہے جان مدینے میں رہے

میرا سارا سرو سامان مدینے میں رہے

---

بس وہی جانتا ہے شانِ کرم کا مفہوم ،

بن کہ جو آپ کا مہمان مدینے میں رہے

---

میں اسے کعبہ مقصود نہ سمجھوں کیونکر

میرا ایمان جب ایمان مدینے میں رہے

---

آپکی یاد میں جو وقت گزارا ہم نے

یوں لگا جیسے کہ ہر آن مدینے میں رہے

---

شوقِ دیدار سوِ ا ہوگیا دیدار کے بعد

دل کو اب بھی ہے ارمان مدینے میں رہے

---

میرے آقا کی کریمی کا اثر تو دیکھو

بن کے نادار بھی سلطان مدینے میں رہے

---

انکے جلووں سے نگاہوں کا ہے وہ ربطِ دوام

واقعی ہم بہر عنوان مدینے میں رہے

---

کعبہ کعبہ ہے وہاں قیمت سجدہ ہے بُہت

عشق کہتا ہے مگر دھیان مدینے میں رہے

---

یہی غربت ہے کہ مہجور رہے دور رہے

یہی دولت ہے کہ انسان مدینے میں رہے

---

رنج و دوری کا بھی سہہ سکتے ہیں لیکن آقا

حاضری کا بھی ایک امکان مدینے میں رہے

---

صبح پُر کیف حسیں شام منّور راتیں

مرحلے زیست کے آسان مدینے میں رہے

---

میرا ایمان مری جان یہ سامانِ حیات

رات دن ہونے کو قربان مدینے میں رہے

---

حاضری بھی بڑا انعام ہے خالدؔ کیلئے

اس پہ ہوجائے یہ احسان مدینے میں رہے