دلنشین خاموشی ، دِلرُبا خطاب اُن کا

دلنشین خاموشی ، دِلرُبا خطاب اُن کا

مہر بے مثال انؐ کی ، خُلق لاجواب اُن کا

---

نعمتیں تمام اُن پر ، جو ہیں صاحبِ کوثر

کائنات ساری میں ہے کہاں جواب اُن کا ؟

---

اولیا تو اِک جانب ، انبیاء میں بھی کب ہے

کوئی ہمقدم اُنؐ کا ، کوئی ہمرکاب اُن کا

---

تیرگی جہالت کی مٹ گئی زمانے سے

خاورِ عرب سے جب اُبھرا آفتاب اُن کا

---

سب عبادتیں برحق ، سب ریاضتیں تسلیم

کون دیکھ سکتا ہے حُسنِ بے حجاب اُن کا

---

اِک طرف کھڑے کیوں ہو ‘ بھیک ہر طرف سے لو!

اِک نہیں ہے ہاتھ اُن کا ، اک نہیں ہے باب اُن کا

---

آرزوئے سائل ہے ، چشمِ التفات اُن کی

زندگی کا حاصل ہے ، لُطفِ بے حساب اُن کا

---

اپنی مدح کی خاطر چُن لیا ہے اعظؔم کو

کس قدر کریمانہ ہے یہ انتخاب اُن کا