گرفتار بلا دنیا میں دنیا دار رہتے ہیں

گرفتار بلا دنیا میں دنیا دار رہتے ہیں

مٹا کر دین اور ایمان ذلیل وخوار رہتے ہیں

---

ہمیں اے فخر عیسی اور کوئی عارضہ کب ہے

تمھاری نرگسی آنکھوں کے ہم بیمار رہتے ہیں

---

اڑا کر مجھ کو مثل بوئے گل باد صبا اب تو

وہاں لے چل جہاں پر احمد مختار رہتے ہیں

---

نہ لائے تاب جنکے دیکھنے کی طور پر موسی

وہی آنکھوں میں اپنی لمعہ انوار رہتے ہیں

---

دکھا دو صورت زیبا کسی دن خواب میں آکر

بہت مضطر تمھارے طالب دیدار رہتے ہیں

---

پلا کر جام عرفاں ساقی کوثر نگاہوں سے

جنھیں بیہوش کرتے ہیں وہی ہشیار رہتے ہیں

---

کہو اس دل میں شیطان لعین کا دخل ہو کیونکر

کہ جس دل میں مکیں وہ دلبر غفار رہتے ہیں

---

نہ پوچھو حال میخواری کچھ ہم سے حضرت واعظ

مئے حب نبی سے رات دن سرشار رہتے ہیں

---

خیال زلف آتا ہے جو بیدم شام سے دل میں

شب فرقت میں نیند آتی نہیں ہشیار رہتے ہیں