ہیں درپئے آزار ستم گر، مرے سرورؐ
للہ۔۔۔۔ کرم کیجیے مجھ پر مرے سرورؐ
گلشن کی فضا ہے تہہ و بالا، شہِ والاؐ
بے رنگ ہے پھر روئے گلِ تر، مرے سرورؐ
پھر ہو مرا گل زارِ تمنا، تر و تازہ
ہو گلبنِ اُمید تناور، مرے سرورؐ
ہو مجھ کو عطا گریۂ پیہم، دلِ پُر غم
ہو عشق ترا میرا مقدّر، مرے سرورؐ
پلکوں پہ رہے میری چراغاں، شہِ دوراںؐ
لب ہوں تری توصیف کے خوگر مرے سرورؐ
سرمایہء جاں ہو تری سیرت، تری طلعت
ہوں میرے شب و روز منور مرے سرورؐ
ہو مجھ کو عطا ذوقِ فراواں شہِ دوراں
ہر شعر ہو تاثیر میں برتر، مرے سرورؐ
ہے عجز کی دولت لیے حاضر ترا شاکر
ورنہ یہ نہیں کوئی ہنرور، مرے سرورؐ
شاعر کا نام :- سیّد شاکر القادری چِشتی نِظامی
کتاب کا نام :- چراغ