جذبۂ حسرتِ دیدار جو تڑپاتا ہے

جذبۂ حسرتِ دیدار جو تڑپاتا ہے

اپنی کوتاہ نگاہی کا خیال آتا ہے

---

جب بھی آجاتا ہے سہواً کبھی جنّت کا خیال

تیرا مسکن ترا در سَامنے آجاتا ہے

---

حق نے جس شہر کے ذرّوں کی قَسَم کھائی ہو

واں اُبھرتے ہُوئے خورشید بھی شرماتا ہے

---

دیکھ کر وسعتِ دامانِ کَرم حشر کے دن

میرا دامانِ طَلَب آپ ہی شرماتا ہے

---

کوئی روتا ہے تو بھر آتی ہیں آنکھیں میری

میں سمجھتا ہُوں مدینہ اِسے یاد آتا ہے

---

نعت کا رنگ جو بدلا تو میں سمجھا اعظؔم

پہلے میں کہتا تھا اب کوئی کہلواتا ہے