جو ہر عرض وجود خلائق اصل اصول کمالی
امت خير أمم دا والی نام محمد عالى
اوّل ، آخر ، ظاہر ، باطن ، نور ظهور مثالی
سب توں سوہنا سب توں اعلیٰ سب توں ارفع عالی
پتہ پتہ پتا اوسے دا پچھے باد صبا نوں
ڈالی ڈالی جھک گئی اوہنوں پیش کرن لئی ڈالی
ہر شے لے کے اللہ کولوں سب نوں ونڈ دا سوہنا
نبی، پیمبر، مرسل، سارے اُسدے ہین سوالی
جو کچھ منگیا مدنی ماہی رب کولوں سو پایا
اک وی گل محبوب اپنے دی ربّ کدی نہیں ٹالی
اس دُنیا دے گلشن اندر کدی بہار ناں آوندی
کملی والا جے ناں ہندا اس گلشن دا مالی
کل جہاناں دے لئی سوہنا رحمت بن کے آیا
کل جہاناں نالوں اُچی اُسدی شان نرالی
اک اک نکتے وچوں اوہنے سو سو نکتے کھولے
اُمّی لقب امام فصیحاں صُورت بھولی بھالی
سب توں اچیاں شاناں والے اسدے گولے بردے
سب قوماں توں اُس دی اُمّت افضل اعلیٰ عالی
عرش معلی نالوں اعلیٰ اس دا گنبد خضری
تاریاں توں ودھ چمکے اوہدے ہجرے پاک دی جالی
اسری دی شب بناں حجابوں رب دیدار کرا کے
دونویں عالم جھولی پائے یار دی مکھ وکھالی
تاریاں نوں چمکارے دیوے اُس دا پاک پسینہ
سُرخیاں ونڈے پھلاں تائیں لب اوہدے دی لالی
کس دے نال دیاں تشبیہاں کس تھیں دیاں مثالاں
رب اوہ سچا ای توڑیا جس وچ صُورت اوہدی ڈھالی
اُس دے آیاں ظلم ستم دے ہو گئے دُور ہنیرے
ایسی شمع محبت والی پاک نبی نے بالی
کیوں ناں ساڈے گلشن اندر ڈیرے لون بہاراں
کملی والا کردا ایہدی ہر ویلے رکھوالی
از میشاں وِچ پے کے قوماں رُتبے پون اُچیرے
سونا جدوں وی کندن بن دا ، بن دا وچ کٹھالی
جد وی امت اوہدی اپنے پیروں ہلن لگی
اوہدے لطف کرم نے آپے فورا آن سنبھالی
ناں کچھ خوف ناں ڈر اے سانوں کسے وی جابر کولوں
ساڈی راکھی کرے ہمیشہ دو عالم دا والی
پاک عرب دی پاک زمین دے صدقے اے محبوبا
دیس میرے دی ہر نعمت تھیں بھر دے جھولی خالی
کالیاں زُلفاں والیا ! دھو چھڈ میرے دفتر کالے
سُنیاں ! لوے چھپا منہ کالے تیری کملی کالی
محبوبا ! نہیں تیرے لائق ونگیاں سدھیاں لیکاں
حال تیرے دا حال کی دن میرے اکھر قالی
یاد تیری دا دیوا دل وِچ تاں میں بالی رکھاں
کالی رات جُدائیاں والی جاوے گذر سوکھالی
اک غلام نکما جيہا ! ہاں تیرا محبوبا
ناں رُومی ، ناں جامی سعدی ، ناں اقبال غزالی
تیری شان دے لائق کتھے میریاں ایہہ تصنیفاں
تیری شان دے لائق کتھے میرے نقش خیالی
تیری شان خُدا دی شانوں نور خُدا دے نوروں
فیضان دا مرکز محور ، تیرا فیض کمالی
میریاں ساریاں عیب ثواباں توں واقف توں شاہا
پھر وی رحم تیرے لج پالا کیتی اے لجپالی
تیرے کولوں جرماں تائیں کیویں چھپا کے رکھاں
جد کہ تیرے اگے خود ہی جرم ہندے اقبالی
سوسو واری صدقے جاواں نام تیرے دے اُتوں
جد وی کوئی مشکل آئی نام تیرے نے ٹالی
تیرے رُعب تہور کولوں کنب دے جابر سارے
مسکیناں نوں سینے لاوے تیری شان نرالی
بو جہلاں دیاں آکڑ خانیاں رد ہوون در تیرے
در تیرے تے قیمت پاوے سوز گداز بلالی
تیری ذات اے پاک منزہ ہر نقصوں ہر عیبوں
تیرے تیکر پہنچ نہیں سکدی گستاخی تے گالی
نظم طویل گئی ہو صائم آکھن یار پیارے
لکھاں جذبے مچل رہے نے میرے دل وچہ حالی
شاعر کا نام :- علامہ صائم چشتی
کتاب کا نام :- کلیات صائم چشتی