کہاں زبانِ سخن ور، کہاں ثنائے حبیبؐ
امید وارِ عنایت ہے نغمہ زائے حبیبؐ
یہ کائنات ہے لطفِ نبیؐ کی آئنہ
رہِ حیات میں تاباں ہیں نقشِ پائے حبیبؐ
شریکِ خستہ دلاں درد مندئ حضرتؐ
محیط کون و مکاں دامنِ عطائے حبیبؐ
خدائے پا ک کو مطلوب اتّباعِ نبیؐ
خدائے پاک کو محبوب ہر ادائے حبیبؐ
مری لحد کو معنبر کرے گی یادِ رسولؐ
اُجال دے گا اسے جلوہء لقائے حبیبؐ
نہ جانے کب ہو زیارت کی آرزو پوری
نہ جانے کونسی منزل ہیں ولائے حبیبؐ
شاعر کا نام :- حفیظ تائب
کتاب کا نام :- کلیاتِ حفیظ تائب