کملی والے دے در اُتے گردن جھکا
تیری جھولی مراداں تھیں بھر جائے گی
رب عالم دا در ہے در مصطفے
اوتھے تقدیر تیری سنور جائے گی
میرا محبوب جدھروں وی لنگھدا گیا
اوسے پاسے زمانے نوں رنگدا گیا
ٹکٹ اوہنوں وی جنت دامل جائے گا
جہنوں مل اوبدی گرد سفر جائے گی
جا کے طیبہ دے وچ ترلے پوندی رہویں
کملی والے نوں رو رو مناؤندی رہویں
جاندی ڈب اے تکبر دی بیڑی سدا
جھیڑی ڈر جائے گی اوہو تر جائے گی
داج عملاں دا تیار کر دی رہویں
نال ہنجواں دے دامن نوں بھر دی رہویں
بھاویں کوہجی اے اوسے نوں رتبہ ملے
بن سہاگن پیا دے جو گھر جائے گی
جے توں لیناں اے کجھ سچی سرکارتوں
جان کردے فدا سوہنے دلدار توں
زندگی اوہنوں مل دی ہمیشہ دی اے
جہیڑی پہلوں مرن نالوں مر جائے گی
کتھوں تیکر اے محبوب دا مرتبہ
باہجھ رب دے کسے نوں وی کجھ نئیں پتہ
اوتھوں تیکر ای بس دیکھ سکدا اے اوہ
جتھوں تیکر کسے دی نظر جائے گی
شعر کاہدے نے میرے تے کی شاعری
ایہ تے عادت جہئی بن گئی اے دل لان دی
زندگی میری صائم فراقاں دے وچہ
کچھ گزر گئی اے باقی گذر جائے گی
شاعر کا نام :- علامہ صائم چشتی
کتاب کا نام :- کلیات صائم چشتی