خوشا! مژدہ سنایا جا رہا ہے

خوشا! مژدہ سنایا جا رہا ہے

مجھے در پر بلایا جا رہا ہے

---

ہجومِ غم میں کر کے دستگیری

مذلّت سے اٹھایا جا رہا ہے

---

تہجد کی گھڑی میں نعت کہ کر

مقدّر کو جگایا جا رہا ہے

---

متاعِ عفو دے کر عاصیوں کو

کرم وعدہ نبھایا جا رہا ہے

---

شفاعت کی ردا میں مصطفیٰؐ کی

گناہوں کو چھپایا جا رہا ہے

---

لبوں پر نام ہے خیر النسا کا

جبینوں کو جھکایا جا رہا ہے

---

خوشا اے نعت گو شاخِ عطا کو

تری خاطر ہلایا جا رہا ہے

---

ہوا دل خوگرِ وصلِ مواجہ

پلٹ کر اب نہ آیا جا رہا ہے

---

ملے مژدہ قریں روضے کے طاہرؔ

مرا مدفن بنایا جا رہا ہے