لکھ خمیدہ ابروانِ مہربانِ خلق کو
قوس ، محرابِ حرم ، شمشیر ، قدرت کی کماں
کا کُلِ مشکیں ، خطا پوشی کا عنواں بے نظیر
لیلیٰ ٔ شب ، جامعۂ کعبہ ، پناہِ عاصیاں
جنبشِ لب ، گفتگو ، طرزِ سخن ، حُسنِ کلام
دل بَری ، دل برونی ، دل بستگئ عاصیاں
نورِ دندانِ مبارک کی چمک سے ماند ہیں
برق ، ناسفتہ گُہر ، کرنیں ، ستارے ، کہکشاں
بوئے زُلفِ احمدِ مختار ، تجھ کو کیا لکھوں
عود و عنبر ، مشک و کیسر ، یا نسیمِ گلستاں
دیکھنا نقشِ کفِ پا کا ذرا حُسن و جمال
روشنی در روشنی اور کہکشاں در کہکشاں
گوشۂ دامانِ رحمت میں شہِ ذیشان کے
بحر و بر ، ارض و سماء ، لوح و قلم ، کون مکاں
رتبۂ اسمِ محمد ، حمد پہ طرّہ ہے مِیم
اِک وسیلہ ، ایک پردہ ، واسطہ اِک درمیاں
اُن کے اندازِ کرم کے کیا کہوں کتنے ہیں نام
موجِ دریا ، ابرِ باراں اور بحرِ بیکراں
دوستوں جب بھی دُعا مانگو تو یہ مانگو ضرور
اُن کی نسبت ، اُن کا غم ، اُن کی رضا ، اُن کی اماں
اُن کے در سے کیا نہ پا یا تجھ سے عاصی نے ادیبؔ
عشق و آنسو ، غم ادب ، احساس ، اندازِ بیاں
شاعر کا نام :- حضرت ادیب رائے پوری
کتاب کا نام :- خوشبوئے ادیب