لپٹ کر سنگِ در سے خوب رو لوں
سیاہی قلب کی اشکوں سے دھو لوں
بڑا دل کش مدینے کا ہے منظر
یہی منظر نگاہوں میں سمو لوں
حذر ہے در بدر کی ٹھوکروں سے
محمدﷺ مصطفیٰ کے در کا ہو لوں
زیارت خواب میں ہو جائے شاید
اسی امید پر کچھ دیر سو لوں
ثنا خواں ہوں شہِ کون و مکاں کا
جو امرت نعت کا کانوں میں گھولوں
ادب خاموش رکھتا ہے زباں کو
کہیں اعمال سے نا ہاتھ دھو لوں
بڑے ارمان ہیں اشفاقؔ دل میں
میں کشتِ نعت میں کچھ لفظ بو لوں
شاعر کا نام :- اشفاق احمد غوری
کتاب کا نام :- صراطِ حَسّان