مکی مدنی ماہی سوہنا پیار سکھائی جاندا
ناداراں مجبوراں اتے کرم کمائی جاندا
ساڈے غم وچہ یار ظہوریؔ نیر وگائی جاندا
عرشاں تے وی جاکے ساڈا درد ونڈائی جاندا
وچہ دلاں دے رچ دے جاون بول رسیلے بولے
بڑیاں بڑیاں شکلاں والے بن گئے اوہدے گولے
ہر ویلے پئی رحمت جس دی عاصیاں تائیں ٹولے
اس سوہنے دے یار ظہوریؔ کسے میدان نہ ڈولے
خلق سوہنے دا منیاں سب نے اپنیاں نالے غیراں
جسم تے پتھر وجدے ہوون فیر وی منگے خیراں
عرب دی دھرتی آن وسائی جس سوہنے دیاں پیراں
اوہ معراج دی رات ظہوریؔ عرش تے کردا سیراں
شاعر کا نام :- محمد علی ظہوری
کتاب کا نام :- کِتھے تیری ثناء