میرے نبیؐ دے نال جہدا پیار ہوگیا
سمجھو خدا وی اوہدا طرَف دار ہوگیا
جِس نوں خُدا نے بخشی گدائی حُضورؐ دی
اوہ ایس کائنات دا سردار ہو گیا
عاشق نہ خُلد دا نہ شرابِ طہُور دا
جہڑا تری نگاہ دا مے خوار ہو گیا
حبشی تے پَے گئی جدوں سرکارؐ دی نظر
سارا زمانہ اوہدا خریدار ہوگیا
آئے حضورؐ لَے کے شفاعت دا اختیار
بیڑا گناہگاراں دا بَس پار ہوگیا
اعظؔم کروڑ جان نثار اوس اکھّ توں
جِس نوں رسُولِؐ پاک دا دیدار ہوگیا