موجاں و چہ موجاں آجاون ہنجواں دی وگدی نہر دیاں
جد گلاں کردا اے کوئی سوہنے دے سوہنے شہر دیاں
بھاویں یوسف بُرقعہ چک آوے خواہ چن دھرتی تے ڈھک آوے
جہاں تکیا کملی والے نوں اوہ نظراں کتے نہیں ٹھہر دیاں
اکھیاں نوں چانن مل جاوے کھوہ کھارے مٹھے ہو جاون
لب پاک اوہدا جد لگ جاندا تاثیراں بدلن زہر دیاں
سرکار دے روضے تے جا کے سب عیب اوہناں دے دُھل جاندے
مل جان جنہاں نوں دو گھڑیاں روون لئی پچھلے پہر دیاں
ایہہ مُجرم تے ساڈے ہر ویلے اللہ دا غضب بلاندے نے
ڈھک لیندی رحمت سوہنے دی سب سختیاں رب دے قہر دیاں
محبوب دی بستی دی صائم پُرکیف فضا کی پُچھناں ایں
طیبہ وچ ٹھنڈیاں ہو جاون سب تیزیاں سخر دوپہر دیاں