نہ جانے کب سے ہے مجھ کو یہ انتظار حضورؐ

نہ جانے کب سے ہے مجھ کو یہ انتظار حضورؐ

کہ میرے سر پہ مدینے کا ہو غبار حضورؐ

---

نگاہ دید سے محرُوم دل تصّرف سے

قرار کِس طرح آئے نہیں قرار حضوؐر

---

بساطِ فِکر ہے محدُود وصف لا محدُود

نہ ہو سکیں ہیں نہ کر پاؤں گا شمار حضُورؐ

---

مجھے بھی کاش وہ مدحت کا شوق دے جس نے

دئے ہیں آپ کو اوصاف بے شمار حضوؐر

---

حضورؐ آپ کا صدقہ ہے کارگاہِ وجُود

اسی سے زیست کا قائم ہے اعتبار حضوؐر

---

حضوؐر آپؐ کے زیرِ قدم ہیں غیب و شہُود

کہ شش جہات کے ہیں مرکزِ قرار حضوؐر

---

کُچھ اس طرح سے مجھے اذنِ باریابی دیں

کہ آؤں آپؐ کے قدموں میں بار بار حضوؐر