نطقِ حق تیری بات اے طَویلُ السُّکوت !
خامشی سرِّ ذات اے طویل السکوت!
افصحِ خَلق ! مصدر بلاغت کا ہے
آپ کی بات بات اے طویل السکوت!
عالِمِ واجب و ممتنع ! آپ ہیں
مالکِ ممکنات اے طویل السکوت!
دے رہا ہوں تِری یاد کی فوج سے
لشکرِ غم کو مات اے طویل السکوت!
تیرے گیسوئے مشکیں سے ہیں فیضیاب
یہ گھٹا ، مُشک ، رات اے طویل السکوت !
ہو مِری گفتگو مختصر اور مفید
لغو سے دے نجات ! اے طَویلُ السُّکوت !
ہوں عطا مجھ کو روزانہ اشعارِ نعت
کم سے کم پانچ سات اے طَویلُ السُّکوت!
روزِ محشر معظمؔ کے غیرِ ثنا
نہ کھلیں پرچہ جات اے طَویلُ السُّکوت
شاعر کا نام :- معظم سدا معظم مدنی
کتاب کا نام :- سجودِ قلم