پاک نظر ، پاکیزہ دل ، پاکیزہ نام
حُسن ، سراپا ، دِلکش و رعنا ، خوش اندام
پتلے ہونٹ ، گلاب کی جیسے پنکھڑیاں
خاموشی میں بھی لہجے کی پھُلجھڑیا ں
جسم اکہرہ ، سینہ کشادہ رنگ سفید
آنکھوں کی گہرائی میں قدرت کے بھید
موتیوں جیسے دانت ، چمکتی پیشانی
پائے مبارک ، نقشِ عروجِ انسانی
سر کے بال طویل اور نیم گھنگھریالے
کالی رُتوں کو چمکیلا کرنے والے
لمبی پلکیں اور سُرخی مائل رُخسار
گیتوں جیسی آہٹ نغمہ سی رفتار
بھینی بھینی خوشیوں جیسا نرم مزاج
خاک نشیں ایسا ، کونّین پہ جس کا راج
تن کے اُوپر سادے سے سادہ جامہ
سر کے اُوپر روشنیوں کا عمامہ