صدقہ تیری چوکھٹ کا شہا مانگ رہے ہیں

صدقہ تیری چوکھٹ کا شہا مانگ رہے ہیں

تجھ سے تیرے مولا کا دیا مانگ رہے ہیں

---

زخم دل محزوں کی دوا مانگ رہے ہیں

ہم لوگ مدینے کی دُعا مانگ رہے ہیں

---

بٹتا ہے جہاں پر بھی تیرے نام کا صدقہ

کشکول لئے شاہ و گدا مانگ رہے ہیں

---

اپنوں پہ بھی ہیں رحمت عالم کی عطائیں

غیروں کا بھی سرکار بھلا مانگ رہے ہیں

---

قسمت کے دھنی ہیں جو طلب گار ہیں تیرے

جو طالب جنت ہیں وہ کیا مانگ رہے ہیں

---

آقا تیرے مہکے ہوئے گلشن کا بھلا ہو

ہم گلشن طیبہ کی ہوا مانگ رہے ہیں

---

سرکار کی مرضی ہے بلائیں نہ بلائیں

کیوں لوگ محبت کا صلہ مانگ رہے ہیں

---

اک چشم کرم ہم پہ بھی حسنین کا صدقہ

بیمار محبت میں شفا مانگ رہے ہیں

---

پھیلائے ہوئے دامن اُمید نیازی

کونین کے والی کی عطا مانگ رہے ہیں