ترا جمال تصور میں آنہیں سکتا

ترا جمال تصور میں آنہیں سکتا

کوئی بھی تیری حقیقت کو پا نہیں سکتا

---

جو ایک بار پکارے تمہاری رحمت کو

ترے کرم سے وہ دامن چھڑا نہیں سکتا

---

کمالِ قربِ خدا ہے مقامِ ’’اَوْاَدْنیٰ‘‘

جہاں کسی کا تخیل بھی جا نہیں سکتا

---

غمِ حضورؐ سے نسبت جسے بھی حاصل ہے

جہاں کی رونقیں دل میں بسا نہیں سکتا

---

ترے غلام تو آقاؐ وہ نقشِ روشن ہیں

زمانہ مل کے بھی جن کو مٹا نہیں سکتا

---

اے پردہ پوش نبیؐ آپ ہی بھرم رکھیے

کسی کے سامنے کاسہ بڑھا نہیں سکتا

---

تمہارے ذکر سے دل جس طرح مہکتاہے

وہ کیف و سوز کا عالم بتا نہیں سکتا

---

ترے کرم کی عدالت میں ایک مجرم ہے

شکیلؔ آپ سے نظریں ملا نہیں سکتا