وجد میں آدم ہے اوجِ آدمیّت دیکھ کر

وجد میں آدم ہے اوجِ آدمیّت دیکھ کر

مصؐطفےٰ کا شیوہ تکمیلِ سیرت دیکھ کر

---

آپ ؐ کو مانا گیا سب سے بڑا تاریخ ساز

زیست کے ہر موڑ پر شانِ قیادت دیکھ کر

---

گھر ابو سفیاں کا بھی ٹھہرا حصارِ عافیت

چرخ حیراں تھا کمال ِ عفوورحمت دیکھ کر

---

شمعِ ایماں ہر دل ِ تاریک میں روشن ہوئی

چہرہ اقدس پہ انوارِ صداقت دیکھ کر

---

اہلِ دانش نے اسے مانا ہے منشورِ حیات

شرعِ محبوبِؐ خدا کی جامعیّت دیکھ کر

---

سازِ دل سے نغمہ کی صورت اٹھی موجِ درُود

عظمتِ کردار پر حق کی شہادت دیکھ کر

---

ذہن میں رکھ آیہ لاَ تَرْ فَعُوْا اَصْوَاتَکمْ

بات کر طبعِ پیمبر کی نفاست دیکھ کر

---

بارگاہِ سرورِؐ دیں میں ہوئی درماں طلب

چشمِ تائب گردشِ احوال ِ اُمّت دیکھ کر