یہ ناز یہ انداز ہمارے نہیں ہوتے
جھولی میں اگر ٹکڑے تمہارے نہیں ہوتے
جب تک کہ مدینے سے اشارے نہیں ہوتے
روشن کبھی قسمت کے ستارے نہیں ہوتے
ملتی نہ اگر بھیک حضورﷺ آپ کے در سے
اس ٹھاٹھ سے منگتوں کے گزارے نہیں ہوتے
ہم جیسے نکموں کو گلے کون لگاتا
سرکار ﷺ اگر آپ ہمارے نہیں ہوتے
بے دام ہی بِک جائیے بازار ِ نبی ﷺ میں
اس شان کے سودے میں خسارے نہیں ہوتے
خالد یہ تصدق ہے فقط نعت کا ورنہ
محشر میں تیرے وارے نیارے نہیں ہوتے