زہد چمکا نہ عمل کوئی ہمارا چمکا
حشر میں عشقِ محمد کا حوالہ چمکا
جب عرب میں تھا ضلالت کا اندھیرا گھر گھر
اس اندھیرے میں مِرا گیسوؤں والا چمکا
جب تصور میں چلے آئے شہِ بحر و بر
چرخِ افکار پہ مدحت کا ستارا چمکا
یا نبی آئیے بس اتنا کہا تھا میں نے
تیز طوفاں کے اشارے پہ کنارا چمکا
غار پر بُن کے شہِ دیں کی حفاظت کے لئے
مکڑیاں ہو گئیں مشہور تو جالا چمکا
بجھ گئی شمعِ ستم ایسی چلی بادِ وفا
کربلا میں مِرے آقا کا گھرانا چمکا
مانگ لے پھر سے مدینے کی فضائیں اُن سے
پھر شفیقؔ اپنے مقدر کو دوبارا چمکا
شاعر کا نام :- شفیق ؔ رائے پوری
کتاب کا نام :- قصیدہ نور کا