زمین، چاند، ستارے، سلام کہتے ہیں

زمین، چاند، ستارے، سلام کہتے ہیں

سلام کہتے ہیں، سارے سلام کہتے ہیں

---

یمِ حیات کے دھارے سلام کہتے ہیں

سمندروں کے کنارے سلام کہتے ہیں

---

نظر نظر ہے تمہارے جمال پر قربان

نظر نظر کے اشارے سلام کہتے ہیں

---

جنھوں نے نام لیا اُن کا، موجِ طوفاں میں

وہ سب پہنچ کے کنارے، سلام کہتے ہیں

---

نہیں ہے نَزع میں جن کو کلام پر قدرت

وہ سانس ہی کے سہارے سلام کہتے ہیں

---

وہ ہیں رسولؐ، کہ اُن پر نثار بحرِ رواں

وہ ناخدا ہیں، کہ دھارے سلام کہتے ہیں

---

یہ کِس کا نُور نظر آرہا ہے دریا میں

حَباب سَر کو اُبھارے، سلام کہتے ہیں

---

نصیرؔ! نام جب آتا ہے اُن کا ہونٹوں پر

دُرود پڑھتے ہیں، سارے سلام کہتے ہیں