ذکرِ محبوبِ خدا وِردِ زباں ہو آمین
یُوں میرا نامۂ اعمال گِراں ہو آمین
کاش اِس شان سے یہ رُوح جُدا ہو تن سے
روبرو روضۂ سُلطانِ جہاں ہو آمین
مست و بے خُود شہِ لولاک کی اُلفت میں رہوں
اُن کی یادوں میں سدا آہ و فغاں ہو آمین
نخلِ ایماں کو مِلے جلوۂ آقا سے بہار
ہے دعا دُور مرا عہدِ خزاں ہو آمین
حشر میں جب کہ مرا نامۂ اعمال کُھلے
رحمتِ سرورِ دِیں سایہ کُناں ہو آمین
خُلد میں ساتھ جہاں شاہ کے خُدّام رہیں
میرے مولیٰ مرا مسکن بھی وہاں ہو آمین
یا خدا حمد لکھے نعت کہے یہ مرزا
طبع پُرجوش رہے خامہ رواں ہو آمین
شاعر کا نام :- مرزا جاوید بیگ عطاری
کتاب کا نام :- حروفِ نُور