پھر پیش نظر سید عالم کا حرم ہے

پھر پیش نظر سید عالم کا حرم ہے

یہ رب محمد کی عنایت ہے، کرم ہے

---

پھر لب پہ مرے ذکرِ شہنشاہِ اُمم ہے

پھر زیر قدم عظمتِ اسکندر و جم ہے

---

طیبہ کا سفر مرحلہ خوف و رجا ہے

ہونٹوں پہ تبسم ہے، مگر آنکھ تو نم ہے

---

انساں کی قبا رنگ الہی سے مزین

یہ اُن کا کرم اُن کا کرم، اُن کا کرم ہے

---

ہر صاحب ایمان کی دھڑکن میں محمد ﷺ

اُس ذات سے دوری کا تصور بھی ستم ہے

---

انسان کی وحدت ہے محمد کا کرشمہ

اس بزم میں تفریق عرب ہے نہ عجم ہے

---

وحشت کا ہر اک نقش بنا جلوہ تہذیب

رو داد یہ دیوار تمدن پر رقم ہے

---

کشفی کے لئے نعت ہے تابوت سکینہ

سرکارِ دو عالم کے سوا کس کا کرم ہے