اے خالق اے مالک میرے خیر خزانیوں پاویں
رُہڑ دی جاندی بیڑی میری پار کرم تھیں لاویں
توں داتا میں منگتا تیرا میری آس پُچاویں
میں عاصی توں بخشنہارا خاص کرم فرماویں
ظاہر حال ترے تے میرا آپے رحم کماویں
اپنے پاک حبیب دے صدقے منزل تے اپڑاویں
اچیاں نیویاں تھاواں سبھے نال کرم دکھلاویں
حل کریں ہر مشکل میری میرے درد گواویں
محشر دے دن مینوں مولا نیکاں وچ اُٹھاویں
اپنے کرم نوں ویکھیں میریاں بدیاں ول ناں جاویں
ایتھے اوتھے دو ہیں جہانیں عشق دا جام پلاویں
صائم اپنے نوں ہر غم توں آپ نجات دلاویں