خدا کی حمد کا ذکرِ نبیؐ کا
بناؤ دل کو مسکن بندگی کا
عبادت سے کبھی ہونا نہ غافل
عبادت ہی ہے مقصد زندگی کا
کروں رب سے طلب میں خیرِ ہستی
وہی مالک ہے میری زندگی کا
رہا دل میں نہ جب سے خوفِ داور
ستاتا ہے ہمیں ڈر ہر کسی کا
یہ بزمِ حمد ہے بیٹھو ادب سے
تقاضا ہے یہی شائستگی کا
خدایا بخش دے مجھ کو خزینہ
شعور و فہم و عقل و آگہی کا
پلا دے مجھ کو یارب وہ مئے حق
نشہ جس میں ہو تیری بندگی کا
غرور و ناز سے رکھ دور یا رب
بنا دے مجھ کو پیکر سادگی کا
درودِ پاک اور ذکرِ الہٰی
وظیفہ ہے یہ احسنؔ اعظمی کا