اغیار کا احسان اٹھایا نہیں جاتا

اغیار کا احسان اٹھایا نہیں جاتا

ہر در پہ یہ سر ہم سے جھکایا نہیں جاتا

---

اس دل کے مقدر میں نہیں کیف حضوری

جو دل تیری یادوں سے سجایا نہیں جاتا

---

قدموں میں بلا لیجئے سرکار مدینہ

اب صدمہ جدائی کا اٹھایا نہیں جاتا

---

احسان پہ احسان کیے جاتے ہیں سرکار

لیکن کوئی احسان جتایا نہیں جاتا

---

ہر ایک کی قسمت میں کہاں جام حضوری

کم ظرف کو یہ جام پلایا نہیں جاتا

---

آتے ہیں وہی جن کو بلائیں شہ والا

ہر ایک کو محفل میں بلایا نہیں جاتا

---

دربان اٹھائیں گے اگر در سے کہوں گا

لاچار ہوں سر مجھ سے اٹھایا نہیں جاتا

---

ہو جاتا ہے اشکوں سے عیاں درد محبت

میں لاکھ چھپاتا ہوں، چھپایا نہیں جاتا

---

یاد آتے ہیں رہ رہ کے مدینے کے مناظر

طیبہ کا سفر مجھ سے بھلایا نہیں جاتا

---

سرکار پہنچتے ہیں وہاں پر بھی نیازی

جس جا کسی ہمدرد کا سایہ نہیں جاتا