اک جاں نواز خوشبو محسوس کر رہا ہوں

اک جاں نواز خوشبو محسوس کر رہا ہوں

شاید میں چلتے چلتے روضے تک آگیا ہوں

---

پھُولوں کی طرح میری سانسیں مہک رہی ہیں

اور آنسوؤں کے موتی میں نذر کر رہا ہوں

---

شرمِ خطا سے میرا ماتھا عرق عرق ہے

اور خوف سے سزا کے خود بھی لرز رہا ہوں

---

د ل بھی لرز رہا ہے ‘ میں بھی لرز رہا ہوں

جیسے میں اپنے آقاؐ کے سامنے کھڑا ہوں

---

پاسِ ادب سے میں نے ہونٹوں کو سی لیا ہے

شائستہء حرم ہوں ‘ آداب آشنا ہوں

---

اب دے رہی ہیں آنکھیں دوہرا سہارا مجھ کو

جلوے بھی روبرو ہیں سجدے بھی کر رہا ہوں

---

اشکوں سے ہو رہی ہے اب میرے ترجمانی

اشکوں ہی کی زبانی فریاد کر رہا ہوں

---

یہ خواب دیکھتا ہوں اکثر میں جاگتے ہیں

روضے کے سامنے ہوں اور نعت پڑھ رہا ہوں

---

صد شکر اک تسلسل قائم ہے زندگی میں

اک نعت کہہ چکا ہوں ‘ اک نعت کہہ رہا ہوں

---

جو کچھ بھی مانگنا ہے ‘ اس در پہ جا کے مانگو

وہ در بہت بڑا ہے جس دَر کا میں گدا ہوں

---

طیبہ کے سب گدا گر مجھ سے گلے ملے ہیں

مجھ کو خبر نہیں تھی میں اس قدر بڑا ہوں