آخری نبّوت کے ایک ایک لمحے میں
بے شمار ازل ملفوف اَن گنت ابد پنہاں
اے مُرادِ بزم کُن تیرے بابِ عالی پر
دست بستہ حاضر ہیں کیا حدوث کیا امکاں
طوفِ گنبدِ خضرا اِن کا مقصدِ تخلیق
کتنے گنبدِ گردوں صُبح و شام ہیں گرداں
اس مکان سے آگے لامکان جتنے ہیں
ہر جگہ چمکتا ہے تیرا چہرۂ تاباں
اس زمان سے آگے لا زمان جتنے ہیں
سب کُروں کی صُورت ہیں تیرے وقت میں غلطاں
کتنے چاند اور سُورج خاک پر بکھر جائیں
تیری ناز فرمائی جھاڑ دے اگر داماں
بیکراں فضاؤں میں کہکشائیں لاکھوں ہیں
سب خراج ہے تیرا اے شہنشہِ دَوراں
عالمین جتنے ہیں تو ہے سب کا پیغمبر
ہر جگہ تری مسند، ہر طرف ترا فرماں
تیری شرع ہے نافذ سب قرونِ ماضی پر
تیری تابعِ منشُور آنے والی سب صدیاں
شاعر کا نام :- عاصی کرنالی
کتاب کا نام :- حرف شیریں