اللہ اللہ مرے نبی دی سب توں شان نرالی اے
سب دے عیب چھپاون والی اوس دی کملی کالی اے
میریاں امیداں دا گلشن ہریا بھریا رہندا اے
جس دن توں میں سبز گنبد دی دیکھ لی ہریالی اے
منہ مدینے ولے کر کے کر فریاداں رو رو کے
اوہ سوہنا لج پال ہے جس نے ہر اک دی لج پالی اے
لکھ روے کوئی کر دا بھاویں دل تھیں اللہ اللہ ہو
جے نئیں دل وچہ عشق نبی دا سمجھو بھانڈا خالی اے
نبیاں دے سلطان دے در دا صدقہ جنہوں جڑیا اے
اس خوش بخت گدا دے در دا ویکھیا جگ سوالی اے
مینوں سدھ بدھ ہو نہ کوئی اینی گل سمجھا دیواں
جس تے راضی ہویا سونہاں اوہو کرماں والی اے
اوہدی مثل مثال نہ کوئی اوہدے جیہا لج پال وی نئیں
سوہنیاں دے اوہ سر دا سائیں کو ہجیاں دا وی والی اے
سدا درود و سلام دے تحفے رب بھیجے جس سوہنے نوں
سب کچھ اوہدی خاطر ہویا اوہ کونین دا والی اے
جھولی وچہ خوشبوآں بھر کے سوہنے نبی دے نام دیاں
مرے شعراں دے گلشن دی مہکی ڈالی ڈالی اے
دل وچہ عشق دا چانن ہووے فیر نیازی دیکھ ذرا
اوہ سرکار دا روضہ دسدا اوہ روضے دی جالی اے
شاعر کا نام :- عبدالستار نیازی
کتاب کا نام :- کلیات نیازی