چہرے پہ خواہشوں کا لکھا بولنے لگے
ہاتھوں پہ اَپنے آپ دُعا بولنے لگے
اتنا ہو دِل میں عشق رسالت مآب کا
سارا وجود صلِّ علیٰ بولنے لگے
جوں ہی میں جاؤں گنبد خضرا کے سامنے
آنکھوں میں آرزو کا نشہ بولنے لگے
میں چُپ رہوں تو سب کی زبانوں پہ ہو سکوت
آواز دُوں تو کوہِ صفا بولنے لگے
ایسا کرم ہو مجھ پہ رسولِ کریمؐ کا
میری زباں میں غارِ حرا بولنے لگے
انجؔم وہ امتحانِ محبت ہو یوں تمام
ٹھہروں میں جس جگہ وہ جگہ بولنے لگے