دیو چا مدینے دیاں دعاواں دعاواں مینوں دین والیو
میرے اتے کرو ایہہ عطاواں دعاواں مینوں دین والیو
جد وی جاؤ شہر مدینے میں وی ہوواں نال تساں دے
لگن نہ تتیاں ہواواں دعاواں مینوں دین والیو
ایہو حسرت ہے وچہ سینے مڑ مڑ جاواں شہر مدینے
ماناں مدینے دیاں چھانواں دعاواں مینوں دین والیو
جتھے سوہنے قدم ٹکائے جتھے جا کے ڈیرے لائے
مڑ مڑ چماں میں اوہ تھانواں دعاواں مینوں دین والیو
میرا مرنا میرا جینا پیارے نبی دا شہر مدینہ
ہور نہ کدھرے میں جاواں دعاواں مینوں دین والیو
ہتھ بنھ جالیاں کول کھلوساں عرضاں کرساں رج رج روساں
منگناں میں اوہدیاں عطاواں دعاواں مینوں دین والیو
رہ جاواں نہ میں کسے گلوں سوہنے دے شہر مدینے ولوں
اوندیاں رہن ہواواں دعاواں مینوں دین والیو
میرے دم نال دم بھر دے او میرے لئے جیوندے مردے او
اللہ تہاکوں دیوے جزاواں دعاواں مینوں دین والیو
میرے سوہنے یار نیازی رہن ہمیشہ راضی راضی
میریاں تے ایہو نے دعاواں دعاواں مینوں دین والیو
ہو جاؤے جے کرم نوازی سوہنے دی ویکھاں جھوک نیازی
رب دا میں شکر بجاواں دعاواں مینوں دین والیو