گھٹائیں غم کی چھائیں دِل پریشاں یارسولَ اللہ
تُمہیں ہو مجھ دُکھی کے دُکھ کا دَرماں یارسولَ اللہ
نگاہِ لُطف و رَحمت کے ہیں خَواہاں یارسولَ اللہ
ہماری مشکلیں ہوجائیں آساں یارسولَ اللہ
بَجُز تو نَیست مُونِس نَیست ہَمدَ م رَحمتِ عالَم
نظر کُن جَانِبِ مَا بَدنَصیباں یارسولَ اللہ
سفینے کے پَرخچے اُڑ چکے ہیں زَورِ طُوفاں سے
سنبھالو!میں بھی ڈوبا اے مِری جَاں یارسولَ اللہ
نسیمِ طیبہ سے کہدو دِلِ مُضطَر کو جھونکا دے
غموں کی شام ہو صُبحِ بَہاراں یارسولَ اللہ
مَناظِر بے وَفا دُنیا کے ہوں سب دُور نَظروں سے
تصوُّر میں رہیں طیبہ کی گلیاں یارسولَ اللہ
نہ مُجھ کو آزما دُنیا کا مال و زَر عطا کرکے
عَطا کر اپنا غم اور چَشمِ گِریاں یارسولَ اللہ
تِرے دیدار کا طالِب لگائے آس بیٹھا ہوں
خُدارا اب دکھادے رُوئے تابَاں یارسولَ اللہ
مِرا سینہ مدینہ ہو مدینہ میرا سینہ ہو
رہے سینے میں تیرا درد پِنہاں یارسولَ اللہ
سُنَہْری جَالیاں ہوں آپ ہوں اور مجھ سا عاصی ہو
وہیں یہ جاں جُدا ہو جَانِ جاناں یارسولَ اللہ
مُجھے ہریالے گُنبد کے تَلے قدموں میں موت آئے
سلامت لے کے جاؤں دین و ایماں یارسولَ اللہ
نہیں حُسنِ عمل کوئی مِرے اَعمال نامے میں
تری رَحمت مِری بخشش کا ساماں یارسولَ اللہ
پڑوسی خُلد میں بدکار کو اپنا بنا لیجے
جہاں ہیں اتنے اِحساں اور اِحساں یارسولَ اللہ
مدینے میں شہا عطّارؔ کو دوگز زمیں دیدے
وَہیں ہو دَفن یہ تیر ا ثَنا خواں یارسولَ اللہ