اک در دے ہو کے بہہ گئے آں در در تے گدائیاں کیتیاں نئیں
جنہاں عشق نمازاں پڑھیاں نیں اکھاں مڑ کے قضائیاں کیتیاں نئیں
دن رات توں بھاویں بانگاں دے کدی یار نے پھیرا پاؤناں نئیں
جے من وی مسجد دے اندروں توں یار صفائیاں کیتیاں نئیں
جد یار دی مرضی من لئی تے سب رولے مک گئے میں توں دے
اساں ایہو کھٹیاں کھٹیاں نیں کوئی ہور کمائیاں کیتیاں نئیں
ایہہ تانے بانے سوچاں دے ایہ قصے سوت کسوتاں دے
اودوں تک نہیں جد تک من اندر مرشد رشنائیاں کیتیاں نئیں
جس دن دا یار نوں دیکھ لیا سب رستے بھل گئے مکتب دے
ایسا سبق پڑھایا عشق ہوراں مڑ ہور پڑھائیاں کیتیاں نئیں
تیرا ہجر ستاوے جس ویلے تری دید دا دارو منگدے نیں
ترے عشق دیاں بیماراں نے کدی ہور دوائیاں کیتیاں نئیں
اوہدے گیت نیازی گاؤندا رو الله دا شکر بجاؤندا رو
اوہ کیہٹریاں کرم نوازیاں نیں تیرے نال جو سائیاں کیتیاں نئیں
شاعر کا نام :- عبدالستار نیازی
کتاب کا نام :- کلیات نیازی