اذنِ طواف لے کے شہِؐ دیں پناہ سے

اذنِ طواف لے کے شہِؐ دیں پناہ سے

کعبے کو جا رہا ہوں مدینے کی راہ سے

---

گزروں خیال میں بھی جو اُس بارگاہ سے

ٹپکے عرق جبیں سے ندامت نگاہ سے

---

اک روشنی کہ نُورِ رسالت ہے جس کا نام

اُتری زمیں پہ ہوتی ہوئی مہر و ماہ سے

---

ماحول کی ضیا ہو کہ ہوں فکر کے چراغ

کرتے ہیں کسبِ نُور اُسی جلوہ گاہ سے

---

ایسی کوئی صفت جو عمل میں ڈھلی نہ ہو

منسُوب ہو سکی نہ رسالتؐ پناہ سے

---

حیرت کی بات ہے کہ لیا ہے خراجِ حق

اک بوریا نشیںؐ نے ہر اک کج کلاہ سے

---

مسلک کوئی ہو منزلِ مقصُود ایک ہے

ہر راہ جا ملی ہے مدینے کی راہ سے