کملی والیا شاہ اسوارا ، ائے عربی سلطانان
واگاں موڑ کدی ول میرے عرش دیا مہماناں
دل اپنا پرچائی رکھاں لے لے تیرا ناں اے کملی والڑیا
کر دیہہ کملی دی چھاں اے کملی والڑیا
کون میرا بن تیرے دردی جیہڑا درد ونڈاوے
بیڑا بحر غماں چوں بنے کون تیرے بن لاوے
تیرے باہجھوں اوگُنہاراں دی کہیڑی اے تھاں اے کملی والڑیا
کر دیہہ کملی دی چھاں اے کملی والڑیا
غاراں دے وچ روون والیا میرے درد مُکاویں
تڑف تڑف کے میں مر چلیاں محبوبا گل لاویں
تیرا ہوکے کیوں در در دے دھکے دھوڑے کھاں اے کملی والڑیا
کر دیہہ کملی دی چھاں اے کملی والڑیا
بُھکھیاں ننگیاں دا توں داتا ہر نعمت ورتاویں
اپنے پیٹ تے پتھر بنھیں خلقت کُل رجاویں
سو سو واری کرم تیرے توں صدقے واری جاں اے کملی والڑیا
کر دیہہ کملی دی چھاں اے کملی والڑیا
میں جیہا منگتا تیں جیہا داتا ناں ہویا ناں ہوناں
ہر کوہجھے توں کوہجا صائم توں سب جگ توں سوہناں
فیر بھی تیرے کرم تھیں تیریاں نعتاں پیا سُناں اے کملی والڑیا
کر دیہہ کملی دی چھاں اے کملی والڑیا
شاعر کا نام :- علامہ صائم چشتی
کتاب کا نام :- کلیات صائم چشتی