خدا کے لُطف و کرم پر نظر نہیں رکھتے

خدا کے لُطف و کرم پر نظر نہیں رکھتے

در ِحبیبؐ پہ جو اپنا سَر نہیں رکھتے

---

شفاعت اُن کی جو پیشِ نظر نہیں رکھتے

وسیلہ حشر میں وہ معتبر نہیں رکھتے

---

جو بے خبر ہیں محمدؐ کے عشق سے اب تک

قسم خدا کی وہ اپنی خبر نہیں رکھتے

---

ملے گا اذنِ حضوری تو اُڑ کے جائیں گے

کہا یہ کس نے کہ ہم بال و پَر نہیں رکھتے

---

سوال ہی نہیں ایسوں کی سر بُلندی کا

جو آستانِ محمدؐ پہ سَر نہیں رکھتے

---

دیار پاک ہی اپنی مُراد ، اپنا وطن

بس ایک گھر ہے کوئی اور گھر نہیں رکھتے

---

جو اُن کے دَر کے گدا ہیں وہی ہیں دل کے غنی

وہ ذرّہ بھر طلبِ سیم و زر نہیں رکھتے

---

وہ لائیں بزمِ رسالتؐ میں نعت کے اشعار

جو مال و دولت و لعل و گُہر نہیں رکھتے

---

نصیرؔ وہ جو بُلائیں تو کون رُکتا ہے

وہ جا پہنچتے ہیں جو بال و پَر نہیں رکھتے