کی پُچھدا ایں میرا حال مدینے جاوندیا
بس لے چل اپنے نال مدینے جاوندیا
جھولی تیری کملی والا نال کرم بھر دیوے
من میرا لویں سوال مدینے جاوندیا
دھو دھو پیر پیاں گا تیرے پیر پیر دے اُتے
ناں عرض میری نوں ٹال ، مدینے جاوندیا
شہر مدینے والا تیریاں پوریاں کرے مُراداں
نالے کٹ دیوے سب کال، مدینے جاوندیا
جے تینوں مجبوری کوئی میرا اک نذرانہ
چند اتھرو لے جا نال ، مدینے جاوندیا
ایہہ میرا نذرانہ ادبوں کر دئیں پیش نبی نوں
ایہہ اتھرو لویں سنبھال ، مدینے جاوندیا
صائم ورگے لکھاں جس دے ویکھن نوں پئے ترسن
جا ویکھ اوہ پاک جمال ، مدینے جاوندیا
شاعر کا نام :- علامہ صائم چشتی
کتاب کا نام :- کلیات صائم چشتی