لا مکاں کی خلوتوں میں جلوہ فرما آپؐ ہیں

لا مکاں کی خلوتوں میں جلوہ فرما آپؐ ہیں

بزمِ” او ادنی“ کی پیشانی کا طغرا آپؐ ہیں

---

اے شہِ لولاک اے وجہِ نمودِ کائنات

مسند آرا برسرِ عرشِ مُعلّا آپؐ ہیں

---

آپؐ ہی کے زمزمے ہیں بربطِ داودؑ میں

دستِ موسیٰؑ کے لیے بھی نور افزا آپؐ ہیں

---

عقل پر جس سے کھلے ہیں عالمِ امکاں کے راز

معرفت کا، علم کا ایسا مجلّا آپؐ ہیں

---

آپؐ ہی سے نور پاتے ہیں، ازل ہو یا ابد

ظلمتوں میں روشنی کا اک منارا آپؐ ہیں

---

کوئی عفو و درگزر میں آپؐ کا ثانی نہیں

اے رسولِ ہاشمیؐ، رحمت کا دریا آپؐ ہیں

---

وادیء جاں میں ہے خوشبو آپ ہی کی یا نبیؐ

گوشۂ دل میں ہے جس کی یاد، آقا آپؐ ہیں

---

میں کہاں جاؤں، سناؤں کس کو اپنا حالِ دل

میرا مامن، میرا ملجا، میرا ماوا آپؐ ہیں

---

آپ کا ہے، آپ ہی کو مانگتا ہے آپ سے

اس دلِ بے تاب کی ہر اک تمنا آپؐ ہیں