مسرت، شادمانی، اور شہرت بھی میسر ہے

مسرت، شادمانی، اور شہرت بھی میسر ہے

مِرے دامن میں جو ہے صدقۂ نعتِ پیمبر ہے

---

بجا زاہد مِرے اعمال کا دفتر سیہ تر ہے

بھروسا بھی تو مجھ کو رحمتہ للعالمیں پر ہے

---

تصور کے قدم جاکر جہاں دم توڑ دیتے ہیں

مقام اُن کا وہاں سے اور اوپر اور اوپر ہے

---

شہِ بطحاٰ کی زلفیں آیتِ والیل کی تفسیر

وضاحت والضحیٰ کی آپ کا روئے منور ہے

---

کہا کفار نے ابتر تو قرآں یہ پکار اُٹھا

حقیقت میں رسول اللہ کا دشمن ہی ابتر ہے

---

جبیں گِھستا ہے سورج مصطفےٰ کے در پہ آ آ کر

تبھی تو آسماں پر اس قدر اتنا منور ہے

---

پسینہ جس دلہن نے مل لیا حضرت محمدﷺ کا

پھر اُس کی سات نسلوں تک ہر اک بچہ منور ہے

---

جمالِ مصطفےٰ کا تو تصور بھی نہیں ممکن

قمر کیا ہے؟ فقط عکسِ کفِ پائے منور ہے

---

شفیقؔ آکر فرشتے قبر میں کہدیں تو کیا کہنا

اِسے آرام کرنے دو نبی کا یہ ثنا گر ہے