سانول سوہنا یار یار انوکھڑا
لنگھیا عرشوں پار یار انوکھڑا
دو جگ تے اوہدی سلطانی جبرائیل کرے دربانی
نبیاں دا سردار یار انوکھڑا
آیا جد کونین دا والی ہر پاسے ہوئی ہریالی
مہک پئی گلزار یار انوکھڑا
چن توڑے سورج پرتاوے جو چاہوے اوہ کر دکھلاوے
ہے کلی مختار یار انوکھڑا
جھکدے جھکدے ڈردے ڈردے نبی ولی سب عرضاں کر دے
سوہنے دے دربار یار انوکھڑا
روضے دے میں گردے گھماں مڑ مڑ سوہنیاں جالیاں چماں
شکر کراں لکھ وار یار انوکھڑا
سکے رکھ مڑ ہوون ساوے جے میرے گھر پھیرا پاوے
اوه میرا من ٹھار یار انوکھڑا
جنہاں سیاں دیاں اکھیاں لڑیاں رہن اڈیکاں دے وچ کھڑیاں
بھلیاں ہار شنگار یار انوکھڑا
کی میری اوقات نیازی یار دی ہو گئی کرم نوازی
ہو گیا بیڑا پار یار انوکھڑا