سُنو جے میرے دُکھّڑے تے سنانواں یارسُولؐ اللہ
جے آکھو تے مدینے مَیں وی آنواں یارسُولؐ اللہ
مَیں اپنے شوق نوں ویکھیاں کہ اپنے آپ نوں ویکھاں
مَیں کیہڑے مان تے گھر وِچ بُلانواں یارسُولؐ اللہ
بڑا چا اے زیارتِ دا بڑی حسرت اے ویکھن دی
کدی آووتے اکھّاں تے بٹھاواں یارسُولؐ اللہ
کدوں صُورت وکھاووگے کدوں حسرت مٹاوو گے
کِتے ویکھن توں پہلوں مَرنہ جانواں یارسُول ؐ اللہ
تُساڈے ذِکر وچ گُذری اے ساری زندگی میری
تُساڈے عِشق وچ دُنیاتوں جانواں یارسُوؐل اللہ
مَیں نظراں نیویاں کر کے پھِراں میدانِ محشر وچ
خدا دے سامنے کیہہ مُنہ وکھانواں یارسُولؐ اللہ
بِناں دیدار نئیں دارُو کوئی اعظؔم دے درداں دا
مَیں کر کر دیکھیاں لکھّاں دوانواں یارسُولؐ اللہ
شاعر کا نام :- محمد اعظم چشتی
کتاب کا نام :- کلیاتِ اعظم چشتی