ترے کرم کا خدایا کوئی حساب نہیں

ترے کرم کا خدایا کوئی حساب نہیں

ہے کون جو تری رحمت سے فیض یاب نہیں

---

متاعِ حُبِ نبیؐ ہے تو کامیاب ہیں ہم

بغیر اس کے کوئی شخص کامیاب نہیں

---

وہ ہوگا حشر میں محروم جامِ کوثر سے

جسے غلامیِ سرکار دستیاب نہیں

---

نہ ہوگا اس میں وسیلہ رسولؐ کا شامل

حضورِ رب جو دعا تیری باریاب نہیں

---

مثالِ سرورِ کونین اے خرد نہ تلاش

وہ لاجواب ہیں ان کا کوئی جواب نہیں

---

نصابِ زیست کا ایک ایک باب ہو جس میں

سوائے مصحفِ قرآں کوئی کتاب نہیں

---

ستاروں جتنی عمر کی ہیں نیکیاں لیکن

جہاں میں نیکیِ صدیق کا حساب نہیں

---

ہزاروں میل کی دوری سے ساریہ کو خطاب

عمر کے پیشِ نظر گویا احتجاب نہیں

---

فروغِ دیں میں جدا تھی سخاوتِ عثماں

نبیؐ نے یوں ہی غنی کا دیا خطاب نہیں

---

بہادری میں ، قناعت میں ، علم و دانش میں

جہاں میں کوئی بھی ثانیِ بو تراب نہیں

---

عقیدتوں سے ہے منسوب میری نعت احسؔن

کسی بھی شہرتِ دنیا سے انتساب نہیں